Lotlot De Leon, Ibinahagi Ang Huling Habilin ni Nora Aunor

Nagdadalamhati ang buong industriya ng showbiz sa paglisan ng nag-iisang Superstar at Pambansang Alagad ng Sining para sa Pelikula, si Ms. Nora Aunor. Sa kanyang pagkawala, maraming mga kaibigan, kasamahan sa industriya, at pamilya ang nagsadya sa kanyang burol upang magbigay galang at makiramay sa mga naulila. 

Isa sa mga pinaka-pinag-usapan ng mga dumalaw ay ang pagbisita ng ex-husband ni Nora na si Christopher de Leon. Ayon sa kanilang anak na si Lotlot, hindi na kailangang ipaliwanag pa ang pagdalo ni Christopher sa burol, dahil siya ang ama ng kanilang mga anak at naging asawa ni Nora noong mga nakaraang taon.

“Siyempre, hindi mo maalis na dumating ang daddy namin, daddy namin siya, naging asawa niya ng mommy (Nora Aunor) namin, siyempre he need to be here. Si daddy naman is always there to support with everything,eh. Siyempre gusto niya ring makita ang mommy,” pagbabahagi ni Lotlot.

Samantalang hindi lingid sa mga tao na si Nora Aunor ay may matinding pagmamahal para sa kanyang mga anak, ipinahayag ni Lotlot ang kanyang mensahe ng pag-alaala sa kanyang ina.

Ayon sa kanya, “Alam na ni Mommy ‘yun, mula noon hanggang ngayon hindi naman nagbago ang pagmamahal namin sa kanya at siya sa amin m,eh. Wala namang question ‘yun. Ang ibang tao lang naman ang nagbibigay ng kulay at ‘yung mga haka-haka ng iba na.”

Inisa-isa rin ni Lotlot ang mga hindi tamang impresyon ng ibang tao tungkol sa kanilang pamilya, na sinasabing magulo ang relasyon nila sa kanilang ina.

“Sa pananaw ng iba na magulo ang relasyon namin sa nanay namin, which is not true. So, ngayon iwasan muna natin yung mga ganun. Walang issue ngayon, no issue at all. We’ve never have naman an issue with mom and mom have never an issue with us. Please pray for her and remember how bright star she is to everyone,” paliwanag ni Lotlot.

Binigyan-diin ni Lotlot na walang dapat ipag-alala o pagdudahan sa relasyon nila ng kanyang ina, dahil palaging buo at tapat ang kanilang pagmamahalan, at patuloy nilang pinahahalagahan ang alaala ni Nora Aunor sa bawat isa.

 “Please pray for her and remember how bright a star she is to everyone,” pakiusap ni Lotlot sa mga tao na patuloy na magdasal para kay Nora at alalahanin ang kabutihan at liwanag na dinala niya sa buhay ng marami.

Sa isang bahagi ng pag-uusap, naitanong kay Lotlot kung ano ang mga huling mensahe o habilin ng kanyang ina bago pumanaw.

Ayon sa aktres, “Ang mommy naman laging nagbibilin,eh. Lagi niyang ipinaalala sa amin na mahal niya kami at ganoon din kami sa kanya. Alam niya na isang tawag niya lang sa amin ay nandito kami para sa kanya.“

Ayon pa kay Lotlot, ang huling text na natanggap niya mula kay Nora ay may kasamang mga salitang may malalim na kahulugan.

“Huli siyang nag- text sa akin,sinabi niya na huwag nyong pababayaan ang mga bata. Mag focus ka sa mga bata,” pagbabahagi ni Lotlot sa mensahe ng kanyang ina, na patunay ng walang sawang pagmamahal at pangangalaga ni Nora sa kanyang pamilya, kahit sa mga huling sandali ng kanyang buhay.

Sa kabila ng lahat ng haka-haka at kontrobersya, malinaw na ang pahayag ni Lotlot ay isang pagpapakita ng pagkakaisa at respeto sa alaala ng kanilang ina. Ang mga huling habilin ni Nora ay nagsilbing gabay hindi lamang sa kanyang mga anak kundi pati na rin sa mga tagahanga na patuloy na magmamahal at magpapaalala sa kanyang walang kapantay na ambag sa industriya ng pelikula at kultura ng Pilipinas.