Isang emosyonal at makabagbag-damdaming tagpo ang muling pagsasama nina Kim Chiu at Kris Aquino matapos ang halos dalawang taon na hindi pagkikita. Sa pamamagitan ng isang Instagram post, ibinahagi ni Kim ang kanyang kasiyahan at pasasalamat sa kanilang muling pagkikita na aniya’y parang walang nagbago.

“Time may have passed, but some friendships remain timeless. Seeing Ate @krisaquino after so long felt like no time had passed at all,” ani Kim, puno ng emosyon.

Kasama sina Darla Sauler at Miles Ocampo, binisita ni Kim ang “Queen of All Media” sa mismong kwarto nito, kung saan masayang nagkuwentuhan at nagkamustahan sila. Si Kris, na kasalukuyang nagpapalakas mula sa kanyang mga pinagdaanang sakit, ay nakitang nakangiti habang kasama ang mga kaibigan.

“It was so heartwarming to see her smile, even as she continues to regain her strength. With prayers and medicine, you’ll get better soon, Ate,” dagdag pa ng aktres.

Hindi rin nakalimutan ni Kim ang pasasalamat kay Bimby Aquino-Yap na buong pusong naging host ng kanilang pagbisita, maging ang nakatutuwa niyang kwento tungkol sa “extra rice” request ni Darla. Nagpasalamat din si Kim kay Kris para sa isang espesyal na pa-early birthday gift — isang malaking Care Bears Mega Space Molly na labis niyang ikinatuwa.

“Thank you so much, Ate, for the early birthday gift—ang laki pala nito! 🥹 And also, I am always thankful for you, Ate, for everything. Love you so so soo much,” malambing na pahayag ni Kim.

Samantala, ikinatuwa rin ng mga fans ang paglabas ni Kris sa isang event kamakailan kasama ang kaibigang designer na si Michael Leyva — ang kauna-unahang public appearance niya matapos ang matagal na pananatili sa Amerika para sa gamutan.

Si Kris ay patuloy na lumalaban sa ilang autoimmune diseases, at bukas siyang nagbabahagi ng kanyang health journey sa kanyang mga tagasuporta sa Instagram. Ang kanyang pagbabalik sa Pilipinas ay nagsilbing sinag ng pag-asa hindi lamang para sa kanya kundi para rin sa mga nagmamahal sa kanya.

Isang paalala na kahit gaano man kahaba ang panahon, ang tunay na pagkakaibigan ay hindi kumukupas. ❤️