Bong Revilla Naghain Ng Senate Resolution No. 1339 Para Sa National Artist Na Si Nora Aunor

Naglabas ng kanyang taos-pusong pakikiramay si Senador Bong Revilla, Jr. sa pagyao ng isang tunay na haligi ng sining at pelikula sa bansa—ang Superstar at Pambansang Alagad ng Sining na si Nora Aunor, na pumanaw noong Abril 16, 2025.

Sa isang pahayag, hindi itinago ng senador at beteranong aktor ang kanyang kalungkutan sa pagkawala ng isang idolong naging huwaran hindi lamang ng mga artista, kundi ng bawat Pilipinong may pangarap sa larangan ng sining.

““Lubos akong nagdadalamhati sa pagpanaw ng isang tunay na alamat ng sining at kulturang Pilipino. Si Ate Guy ay isang inspirasyon, hindi lamang sa aming mga kapwa artista kundi sa bawat Pilipinong nangangarap at nagsusumikap. Sa loob ng maraming dekada, siya ang naging tinig, mukha, at damdamin ng sambayanang Pilipino,” ayon kay Revilla.

Bilang paraan ng pagpapakita ng kanyang paggalang at pagpupugay, inihain ng senador ang Senate Resolution No. 1339 upang opisyal na kilalanin ang hindi matatawarang kontribusyon ni Nora Aunor sa kultura at sining ng Pilipinas. Kalakip din dito ang pakikiramay ng buong Senado sa mga naiwang mahal sa buhay ng yumaong aktres.

Ang karera ni Nora Aunor sa industriya ay nagsimula noong siya’y manalo sa prestihiyosong Tawag ng Tanghalan noong 1967 sa pamamagitan ng kanyang makabagbag-damdaming pag-awit ng kantang “Moonlight Becomes You.” Sa taglay niyang kakaibang tinig, binansagan siyang “The Girl with a Golden Voice,” at agad na sumikat sa larangan ng musika.

Hindi naglaon ay naglabas siya ng mahigit 500 awitin, kabilang ang mga sikat na kantang “Pearly Shells,” “Handog,” at “People.” Mula sa pagiging isang mahusay na mang-aawit, lumipat siya sa pag-arte at doon lalo pang pinatunayan ang kanyang pagiging multi-talented na artista.

Sa kanyang mahigit limang dekada sa showbiz, bumida si Nora sa mahigit 170 pelikula. Nakamit niya ang iba’t ibang prestihiyosong parangal tulad ng pitong Gawad Urian Best Actress awards at tatlong beses na kinilalang Natatanging Aktres ng Dekada. Pinarangalan din siya ng Film Academy of the Philippines, Cultural Center of the Philippines, at ng National Commission for Culture and the Arts ng mga lifetime achievement awards.

Hindi lamang sa Pilipinas kinilala ang kanyang talento. Si Ate Guy ay iginagalang sa buong mundo—isa siya sa mga iilang Pilipinong aktres na kinilala sa limang magkakaibang kontinente.

Ilan sa kanyang mga internasyonal na parangal ay:

Best Actress sa Cairo International Film Festival (1995) para sa The Flor Contemplacion Story

Best Actress sa Malaysia (1997) para sa Bakit May Kahapon Pa?

Best Actress sa Brussels International Independent Film Festival (2004) para sa Naglalayag

Asia Pacific Screen Award sa Australia (2013) para sa Thy Womb

Isa sa 10 Asian Best Actresses of the Decade (2010) sa North America

Noong 2022, iginawad kay Nora Aunor ang prestihiyosong titulong Pambansang Alagad ng Sining para sa Pelikula at Sining sa Pag-broadcast, isa sa pinakamataas na parangal na maaaring matanggap ng isang alagad ng sining sa Pilipinas.

Sa pagtatapos ng kanyang pahayag, hindi napigilan ni Senador Revilla na maging sentimental:
“Katulad ng paborito mong awitin na ‘I’ll Never Find Another You’, totoo ngang wala nang ibang makakapalit sa iyo, Ate Guy. Isa kang tanging yaman ng sining na kailanman ay hindi malilimutan.”

Isang alamat ang pumanaw, ngunit ang kanyang sining ay mananatiling buhay—sa pelikula, sa musika, at sa puso ng bawat Pilipinong kanyang inantig.