Sa isang madamdaming pagtalakay sa Fast Talk with Boy Abunda, ibinahagi ni Benjamin Alves ang kanyang taos-pusong pagmamahal at paghanga sa kanyang asawang si Chelsea Robato. Hindi lang siya nagbigay ng papuri sa mga katangian ni Chelsea, kundi nagbigay din siya ng isang emosyonal na mensahe para sa kanilang magiging anak.

Ayon kay Benjamin, ang pinakamahusay na katangian ni Chelsea ay ang kanyang “lightness”:
“May certain lightness siya, Tito Boy, na hindi nawawala. Kahit anong pagsubok pa ang pinagdadaanan niya, o kami, o ang buhay niya, may lightness na hindi nawawala.”

Inamin ng aktor na may mga pagkakataong hindi na siya makapaghintay umuwi mula sa trabaho para makasama si Chelsea:
“Naririnig nila sa akin ‘yan, ‘pag nasa taping na kami late at night, ‘Gusto ko nang umuwi sa asawa ko.’ Siya ang dahilan kung bakit ako nagigising, at siya rin ang dahilan kung bakit ako umuuwi.”

Ngunit hindi lang sa pagmamahal nakataya ang kanilang relasyon; binigyang-diin din ni Benjamin na hindi selosa si Chelsea at secure siya sa kanilang pagsasama. Biro pa nga ni Benjamin, ang mga aso nila ang tanging pinagseselosan ni Chelsea.

Para kay Benjamin, ang pagpapalago ng pamilya ang kaniyang pangunahing prayoridad sa ngayon, at ang mga plano sa karera ay nauurong.
“Pareho kaming may mga pangarap, pero hindi ito pangarap kung hindi ito naka-align sa buhay niya. Halimbawa, kung ang pangarap ko ay pumunta sa Hollywood, pero kung magkakaroon kami ng anak—madali lang. Ang priority ko ay ang asawa ko at ang pamilya ko.”

Dagdag pa niya, “Yun ang pangarap. Anuman ang narating ko sa career ko ngayon ay produkto lang ng pagiging masaya sa bahay.”

Sa isang emosyonal na mensahe para sa kanilang magiging anak, sinabi ni Benjamin:
“Enjoy your life. Kung alam mo lang kung ano ang pinagdadaanan ng mommy mo para madala ka sa mundong ito, hindi mo alam kung gaano kalakas ang mommy mo.”

Ikinasal sina Benjamin at Chelsea sa Santuario de San Antonio Parish sa Makati City noong Enero 2024. Samantala, patuloy ang tagumpay sa karera ni Benjamin, at makikita siya sa drama crime mystery series na Akusada, na mapapanood tuwing 4:05 PM sa GMA Afternoon Prime, kasama sina Andrea Torres at Lianne Valentin.